БИШКЕК, 14-апр. — Sputnik. Армениянын президенти Серж Саргсян Евразиялык экономикалык жогорку кеңештин кеңейтилген жыйынында ЕАЭБдин аткара турган иштерин айтып берди.
Ал үчүнчү өлкөлөр менен болгон кызматташуу келишимдерине орчундуу көңүл бурарын белгилеп, Евразия экономикалык комиссиясынын ролу тууралуу дагы айтты.
"Биз биримдиктин алдында турган актуалдуу тапшырмаларды чечүү боюнча сунуштарды Евразия экономикалык комиссиясынан күтүп жатабыз. Эң маанилүү кадам — 60 тоскоолдук көрсөтүлгөн "Ак китепти" басып чыгаруу. Жакынкы аралыкта Жол картасы кабыл алынат", — деди Саргсян.
Ал ошондой эле дүйнөлүк конъюнктурага байланыштуу мындан ары өнүгүүгө тоскоолдуктар бар экенин айтып, ушул эле убакта ЕАЭБ өлкөлөрүнүн экономикалык кооперациясы үчүн кошумча мүмкүнчүлүктөр пайда болуп жатканын кошумчалады.
