БИШКЕК, 15-апр. — Sputnik. Өзгөндөгү жер көчкү бир эмес, эки үйдү басып калганын ӨКМдин маалымат кызматы билдирди.
Белгилей кетсек, 14-апрелде түндө Көлдүк айыл аймагынын Шамал-Терек айылында жер көчүп, анын алдында киши калышы мүмкүн экени айтылган.
"Кырсык болгон жерде жергиликтүү тургундар, милиция болуп жалпысынан 60 киши иштеп жатат. Жер көчкү буга чейин маалымдалгандай бир үйдү эмес, эки үйдү басып калганы аныкталды. Жеринде жүктөгүч жана экскаватор иштеп жатат", — деп айтылат маалыматта.
Жер көчкү жүргөн жерге өкмөттүн Ош облусундагы өкүлү Таалайбек Сарбашев дагы келген. Издөө иштери уланууда.
