БИШКЕК, 16-апр. — Sputnik. Ишемби күнү кечинде Бишкектин жанындагы Боз-Бөлтөк тоосундагы флагштокко барган жаштарга 20 адамдан турган топ кол салгандыгы тууралуу Sputnik Кыргызстан агенттигине күбө билдирди.
Алардын басымдуу бөлүгү өспүрүмдөр болгон.
"Биз кыздар-балдар болуп 12 адам, төрт унаа менен барганбыз. Саат 22.00 болчу. Бейтааныш балдар келип тамеки сурашты. Бизде тамеки жок экенин айтып, кетели деп унааларга отурдук. Бир маалда алардын бири айдоочу жагынан унаага колун салып, бизди токтотконго аракет кылды. Ошондо унааларды тегеректеп калган балдар таш менен соккулап кирди", — деди күбөлөрдүн бири.
Анын айтымында, унааларды 20 адам кууган.
Маалыматка караганда, окуя милициянын посту турган жерден төмөнүрөөк жакта болгон. Ошондуктан, тартип сакчылары башаламандыкты көрбөй калган.
Мындай кол салууга дуушар болгон жаштар, милицияга бүгүн кайрыларын билдиришти.
Флагшток Чүй облусунун Орто-Сай айылында жайгашкан. Эл арасында аны "Панорама" деп аташат.
