БИШКЕК, 22-апр. — Sputnik. Аукционго коюлган Кара-Балтадагы спирт заводун жеңип алган киши аны алуудан баш тарткан. Бул туурасында Мамлектеттик мүлк боюнча фондунун төрагасынын орун басары Бакыт Мураталиев Sputnik Кыргызстан агенттигине кабарлады.
Былтыркы жылдын июль айында Маммүлк фондусу аталган завод 200 миллион 42,8 миң сомго сатылгандыгын кабарлаган. Тоорукта "Алкоинвест" ЖЧКнын ишеним каты менен Константин Дихтярь аттуу адам жеңүүчү деп табылган. Кийинчерээк аталган жайдын кайрадан сатыкка коюлгандыгы тууралуу маалымат чыккандыктан, Sputnik Кыргызстан аталган Фондуга маалымат сурап кайрылган.
"Тоорукка эки тарап катышып, анын бири жеңүүчү деп табылганы менен, ал бир аз убакыттан кийин сатып алуудан баш тартты. Биз түзүлгөн келишимди бузуп, аны менен кошо төлөнгөн 20 миллион сомду бюджетке котордук. Мыйзам боюнча, аукциондун жеңүүчүсү андан баш тартканда жалпы нарктын 10 пайызы мамлекетке калат", — деди Мураталиев.
"Кара-Балта спирт заводу" мамлекеттик ишканасы 1942-жылы түптөлүп, Кант заводунун базасында түзүлгөн. Ишкана негизинен спирт чыгаруу жана аны техникалык жактан иштеп чыгуу боюнча кызмат көрсөтөт. Эгемендик жылдарында да иштеген завод жылына 10 миллион литр этил спиртин өндүрө алат.
