Быйыл мектеп ишке берилиши керек эле. Западное айылынын тургуну Зумрият Резаханованын айтымында, 2015-жылдын күз айында аларга Чүй облусунунун администрация өкүлдөрү, ал тургай губернатордон бери келип 2017-жылдын сентябрь айында балдар жаңы мектепте окуп каларын айтып кетишкен.
"Чуңкурду казып, капсуласын куюп, жаңылык жазып койгон боюнча жок. Бир нече жумадан кийин жумушчулар да майда-чүйдөсүн жыйыштырып алып кетип калышты. Балдарыбыз ысык-суукта үйдөн 5 чакырым алыстыкта жайгашкан мектептерге барып билим алышат. Дайыма эле маршрутка менен барып-келип окуганга каражаты жок болгондуктан, айрымдары окууну таштап коюшууда", — деди айыл тургуну.
Жергиликтүү тургундардын суроолоруна өкмөттүн Чүй облусундагы өкүлчүлүгү толук жообун бере элек. Ал эми Чүй облустук капиталдык курулуш башкармалыгы мунун себебин акчанын жоктугу менен байланыштырышты.
Учурда Западное айылынын башталгыч классынын окуучулары турак үйдө окуп жатышат. Бул имаратты 15 жыл мурун ата-энелер өз күчү менен тургузган. Учурда анын абалы да көңүл жылытаарлык эмес. Ал жакта 4 класста жалпы 56 окуучу билим алат.
