БИШКЕК, 9-май. — Sputnik. Бишкекте жеңил унаа менен жол тандабас бетме-бет келип, кагышканын Sputnik Кыргызстан агенттигине Кайгуул милициясынын маалымат кызматынан кабарлашты.
Жол кырсык Совет жана Сүйөркулов (мурдагы Донецк) көчөлөрүнүн кесилишинде түнкү саат 03.00дө катталган. Кырсыкка Mercedes-Benz 350 менен Mercedes-Benz 210 үлгүсүндөгү унаалар кабылган.
"Жол тандабас Совет көчөсү менен жогору тарапты көздөй, ал эми жеңил унаа ылдыйды көздөй бараткан. Сүйөркулов көчөсү менен кесилишкен жерде жеңил унаанын айдоочусу солго бурулууга аракет жасаганда, унаалар кагышкан. Катуу соккудан улам, Mercedes-Benz 210 үлгүсүндөгү унаа жолдон ыргып кетип, даракты барып сүзгөн", — деп маалымат кызматынан билдиришти.
Эки айдоочунун тең соо экени аныкталган.
Тез жардам кызматынан эки айдоочу орто деңгээлдеги жаракат алышканын маалымдады.
