БИШКЕК, 14-май — Sputnik. Президент Алмазбек Атамбаев Кытайдагы Синьцзян-Уйгур автономдуу районунун Соода-өнөр жай палатасынын вице-президенти Ми Эньхуа менен жолукту. Бул тууралуу өлкө башчынын маалымат кызматы билдирди.
Белгилей кетсек, Эньхуа Үрүмчү шаарынын Элдик саясий консультативдик кеңеш төрагасынын орун басары, Үрүмчү шаарынын "Хуалин групп ЛТД" соода-өнөр жай компаниясынын президенти болуп саналат.
Буга чейин Атамбаев Кытайдын жол жана көпүрө куруу мамлекеттик корпорация башкармалыгынын төрагасы Лу Шань менен жолуккан. Анда түндүк-түштүк альтернативдик жолун, Кытай — Кыргызстан — Өзбекстан темир жолун жана Бишкек шаарындагы жолдорду оңдоо иштери боюнча маселелер каралган.
Ушул тапта Кыргызстандын президенти Алмазбек Атамбаев Пекинде өтүп жаткан "Бир алкак — бир жол" эл аралык форумуна катышууда. Анын алкагында ал Кытайдын төрагасы Си Цзиньпин менен жолугушуусу пландалган.
