Шиш така, ашынган айдоочу жана тост. Чет элдиктердин оозун ачырган Бишкектеги 9 учур

БИШКЕК, 21-май — Sputnik. Башка өлкөлөргө чыкканда ар бир адам ал жактагы көрүнүштөргө таасирленет, айрымдарына айран таң калат. Бишкек боюнча таасирлеринен кеп кылсам чет өлкөлүк тааныштарымды окшош эле нерселер таңдантканын байкадым.

1. Татына айымдар көп, бирок келишимдүү мырзалар аз. Бул, балким, жигиттерди кубантар. Кантсе да, аялзатынын жүрөгүн ээлеш үчүн атаандаштары аз болот эмеспи.

Бирок ошону менен бирге эле меймандарыбызга биздин сулуулардын күндүзү да кечки макияж менен жүрүшү жана күнүгө бийик така кийиши абдан таң калычтуу экен.

2. Муңайым колуктулар. Чет элдиктер бизде өткөн үйлөнүү үлпөттөрүндө колуктулардын суз жана уялыңкы болорун белгилешет. Коноктор жыргап тойлоп жатканда ак жоолукчандардын кабагы салыңкы болушу жат көрүнөт.

Меймандарыбызга кыздын өз үйүнөн узап жатышын, жаңы келиндин ордун, дегеле, карапайымдык жогору бааланарын түшүндүрүүгө туура келет.

3. Жолдордогу экстремалдуулук. Бир таанышым жашоосунда акула менен да сүзүүгө, парашюттан да секирүүгө үлгүргөн. Бирок Бишкекте машина айдагандан кийин ал жетишкендиктери баланын оюнчугундай болуп калганын айтат. Баамында, борбор калаабыздын айдоочулары – ашынган экстремалдар.

4. Дасторкондун жазылышы. Бешбармак менен торттун бирге коюлушун чет элдиктер дегеле түшүнбөйт экен. Батышта бир тамактан кийин стол үстү жыйналып, соңунда гана таттуу берилет эмеспи.

5. Бишкек – жаштардын шаары. Кымбат ресторан жана барларда айрыкча жаштардын көп эс алышы да аларга кызык. Адатта студенттер акчасыз келишет го.

Англиялык бир айым элүүдөн ашкандар эс алчу жай таба албай көңүлү чөгүптүр. Барган жеринде улгайган эне катары кабылданып, бул жакта 50дөн кийин өмүр бүтчүдөй сезилген. Ушул жашка келгени адамдар ырдап-бийлеп көңүл ачпай калгандай көрүнгөн ага.

6. Кымбат нерселерге болгон ашыктык. Бишкек жөнүндө чет элдик кишинин бизнес-планынан: "Шаардын бир чарчы аянтында Range Rover менен айфондордун мынчалык көп болушу шумдук" деп жазылганын окудум. Буга башка кеп улап кереги жоктур.

7. Эл алдында сүйлөө – жепжеңил! Бир тойдо жүздөгөн адамдын алдында эч тартынбастан узак каалоо айткан кишиге жанымда олтурган италиялык айым абдан таңданган эле. "Жер жүзүндө миллиондогон адамдар эл алдында сүйлөгөндөн тартынмак. Силер үчүн бул оңой экен. Азаматсыңар!" – деп суктанганын жашырган эмес.

8. Күнү-түнү иштеген дүкөн, ресторан, атургай, банктар. Бул көрүнүш европалыктардын көңүлүн ээлеп, өздөрүндөгү ишканаларга да бул тажрыйбаны кабыл алууну сунушташарын билдиришет. Европада банктарда күнү-түнү көрсөтүлгөн кызмат тургай, дүкөн, ресторандын баары эле дем алышта иштей бербейт.

9. Кыргызстанда төрт мезгилди тең көрөбүз. Дүйнөнүн бардык эле өлкөлөрүндө биздегидей чайыттай күн тийип, же кар калың түшө бербейт. Англиялыктар күнгө күйүүгө жетишерлик болгон саратан маалын бааласа, австралиялыктар биздеги калың карды керемет катары кабыл алышат.

Өлкөбүзгө мейманчылаган чет элдиктердин баары мындай ойдо дегенден алысмын, бул жазылгандарды олуттуу кабыл алууга да чакырбайм. Болгону башка маданий тарбиядагы, соңку жылдары Бишкекти көп байырлай баштаган чет элдиктердин пикирин гана топтодум.

Башкаларга окшошпогон жактарыбыз бизди айырмалап турат эмеспи, ал эми ага сырттан салынган байкоо ой толгоого, өзүбүзгө башка кырдан көз салууга көмөк болорун айткым келет.