БИШКЕК, 31-май — Sputnik. Өкмөттүн "Милдетин так аткаруу үчүн тийиштүү деңгээлде кыргыз тилин билиши керек болгон мамлекеттик кызматкерлердин тизмесин бекитүү жөнүндө" токтом долбоору коомдук талкууга коюлду.
Бул норманы ишке ашыруу үчүн өкмөт 2015-2020-жылдары мамлекеттик тилди өнүктүрүү жана КРде тил саясатын жакшыртуу улуттук программасынын алкагындагы иш-чаралардын планын бекитти.
Долбоордо мамлекеттик органдардын жетекчилерине кыргыз тилин мамкызматкерлерге үйрөтүүдө жардам берүү каралган.
Кызматтык милдетин аткаруу үчүн адамдын тил билүү деңгээлин аныктоону 2018-жылдын 1-январынан баштоо сунушталып жатат.
Кыргыз тилин билүү талабы мамлекеттик саясий кызматтарда иштегендерге, мамлекеттик атайын кызматта отургандарга жана административдик ар кандай кызматтагы адистерге коюлат.
