БИШКЕК, 31-май — Sputnik. Мамлекеттик каттоо кызматы биометрикалык паспорт бир гана шайлоого катышуу үчүн керек деген түшүнүк тайкы экенин билдирди.
Мамлекеттик каттоо кызматынын билдиришинче, 2-майдан тарта 10 миңден ашык КР жараны 2017-жылы чыккан жаңы үлгүдөгү паспортту алып, дагы 50 миңдей киши документтерин тапшырган.
Ошондой эле паспорттогу улуту деген графа чипте жазылганын айтып, каалаган ар бир жаран улутун анкетада жана чипте көрсөтө алат.
"Улуту деген графа документтен таптакыр алынды деген туура эмес, башкача айтканда ал электрондук форматка өткөрүлдү. "Биометрикалык паспорт бир гана шайлоо үчүн керек" деген тар түшүнүк туура эмес. Жарандар тууралуу маалыматты электрондук форматта — чипте сактоо паспортту колдонууда ыңгайлуулукту камсыз кылат", — деп мекемеден билдиришти.
Андан сырткары паспортту даярдоо убактысы эки эсеге кыскарган. Ал бир нече элементтер менен корголгон. Келечекте биометрикалык паспортту айдоочулук күбөлүк, банк жана пенсиялык карта катары колдонууга болот.
Чиптеги ачык маалыматтарды окуу үчүн KGZ eID NFC Reader уюлдук тиркемеси иштелип чыккан. Аны Google Play Market баракчасынан көчүрүп алууга мүмкүн. Чипте жазылган ачык маалыматтарды окуу үчүн NFC кызматы бар уюлдук телефон же планшет керек.
