ШКУга Индия менен Пакистан кошулуп, дүйнөдөгү ири уюмга айланат

БИШКЕК, 9-июн. — Sputnik. Астана шаарында Шанхай кызматташтык уюмунун кезектеги эки күндүк саммити башталды. Саммиттеги негизги маселе Индия менен Пакистандын ШКУга кошулушу болот.

Бул ШКУну элдин саны жагынан эң ири уюмга айландырат. ШКУ өзүнө жер шарындагы элдин дээрдик жарымын бириктирерин РИА Новости жазды.

Негизги иш-чаралар жума күнкүгө белгиленген.

Россия президентинин жардамчысы Юрий Ушаковдун айтымында, өлкө лидерлери уюмду өнүктүрүү, террорчулукка каршы күрөш, Жакынкы Чыгыш менен Афганистандагы кырдаал жана Ирандын ШКУга кирүү арызы боюнча маселелерди талкуулашат.

Жыйын аягында Астана декларациясы, экстремизм, террорчулукка каршы күрөшүү боюнча 11 документке кол коюлат.

ШКУ эл аралык уюму 2001-жылы Кытай, Россия, Казакстан, Тажикстан, Кыргызстан жана Өзбекстандын башчылары тарабынан негизделген. 2016-жылы июнда Өзбекстанда болгон саммитте Индия менен Пакистандын уюмга кирүүсү боюнча Меморандумга кол коюлган. Учурда ШКУга Афганистан, Белоруссия, Иран менен Монголия байкоочулук кылса, Азербайжан, Армения, Камбоджа, Непал, Түркия жана Шри-Ланка өнөктөш өлкө катары эсептелет.