БИШКЕК, 13-июн. — Sputnik. Ата-энелерден түшчү ыктыярдуу төлөмдөргө тыюу салынарын Билим берүү жана илим министри Гүлмира Кудайбердиеванын сөзүнө таянып, өкмөттүн маалымат кызматы билдирди.
Министрдин айтымында, бул боюнча жакынкы 2-3 күндө мэрия менен биргеликте иштелген буйрук чыгат.
"Буйрукту аткарбаган мектеп директорлору жоопко тартылып, ээлеген кызматынан да бошотулушу мүмкүн", — деген Кудайбердиева.
Маалыматка караганда, былтыркы окуу жылында 2 336 мектептен республика боюнча 1,17 миллиондон ашык окуучу билим алды.
Быйыл 11-классты — 61,7 миң, 9-классты — 93,1 миң окуучу, ал эми мектепке чейинки 480 сааттык даярдоо программасын 5-7 жаштагы 138 миң бала аяктайт.
