БИШКЕК, 18-июн. — Sputnik. Кыргызстандык окуучулар АКШнын Нью-Йорк штатында өткөн "Генийлер" олимпиадасынан байге алышты. Бул тууралуу Sputnik Кыргызстан агенттигине "Сейтек" толук эмес жалпы билим берүү мектебинин директору Автандил Тешебаев билдирди.
Кыргызстандык окуучулар дүйнөнүн чар тарабынан келгендер менен таймашып эки алтын, бир күмүш, эки коло медалга ээ болушкан.
"Олимпиадага дүйнөнүн ар өлкөсүнөн келген 12ден 18 жашка чейинки окуучулары учурдун глобалдуу көйгөйү болуп жаткан экологияны коргоо багытындагы эмгектери боюнча күч сынашты. Биздин мектептен 10 окуучу 6 долбоор даярдап барып англис тилинде жактаган. Жыйынтыгында 5 долбоор алдыңкы орундарга жетишип, бирөө кызыктыруучу сыйлыкка татыды", — деди Тешебаев.
Алтын медаль уткан Ильяз Талант уулунун апасы Инаят Жээналиева баласынын жеңишине мектептин салымы чоң экенин белгиледи.
"Ильяз 12 жашта, олимпиаданын эң жаш катышуучусу болуптур. Бул сынакка мугалими Гүлзире Миңбаева менен бир ай бою тынбай даярданган. Анда интернет жана телефон сыяктуу жаңы технологиялардын адамзатка тийгизген таасири деген темада философиялуу картина тартып барып жактады. Балам кыргызча, орусча, түркчө, англисче эркин сүйлөй алат. Ошондуктан тил жагынан кыйналган жок", — деди Жээналиева.
"Сапат" билим берүү мекемесинин маалымат кызматы азырынча толук маалымат келе электигин айтып, байге алгандардын саны дагы өсүшү мүмкүн экендигин билдирди.
