БИШКЕК, 27-июн. — Sputnik. Япониянын Киото шаарында мурунку төрт күйөөсүн жана ойношторун өлтүрүүгө шектелген 70 жаштагы Тисако Какехи аттуу аял соттолуп жатат. Бул тууралуу РИА Новости билдирди.
Ал 2014-жылы акыркы жолдошу Исао Какехини калий цианидин берип ууландырган деген шек менен кармалган. Анын үйүн тинтүүгө алганда порошок түрүндө сакталган препараттар жана медициналык адабияттар чыккан.
Анын каза болгон күйөөлөрүнөн жана ойношторунан калган камсыздандыруу төлөмүнүн суммасы 1 миллиард иенге (болжол менен 9 миллион доллар) жакын экени айтылууда.
Киодо агенттигинин маалыматы боюнча айыпталуучу аял биринчи соттук уктурууда күнөөсүн толугу менен моюндаган.
"Каза тапкандардын төртөө улгайган кишилер болгон. Баары калий цианидине ууланып каза болгон. Алардын абалы жана өлүмүнүн себептери окшош чыкты", — деди прокуратуранын өкүлү.
Тисако Какехи күйөөлөрүнүн мүлкүнө ээ болуу максатында ушундай жолго барган деп айтыпталып жатат. Япониялык аялдын колунан ажал тапкан кишилердин саны дагы көбөйүп 10дон ашышы мүмкүн.
