Ал быйыл Бишкектеги Калый Молдобасанов атындагы улуттук консерваторияны аяктаган. Таңнуру Мухаммет кызы Sputnik Кыргызстан агенттигине берген маегинде эки жактын тойлорундагы айырмачылыктарды айтып берди.
"Бишкектеги тойлорго катышып биринин артынан бири кубалашып тост айткандарды, сөз бербедиң, ырдатпадың деп таарынгандарды көрүп аябай таң калгам. Бизде башында эки жаштын ата-энелери жана жакындары чыгып сүйлөп коёт болду. Андан ары ыр, бий, оюндар менен коштолот. Белгилей кетчү нерсе ал жакта улуу муун менен жаштар аралашып бийлебейт. Аксакалдар эки-үч саат отурат да эт тартылгандан кийин бата кылып кетишет. Анан жаштар өзүнчө калып кеңири ойноп тойду улантышат", — деди Мухаммет кызы.
Ал ошондой эле турмушка узаган кыз башын жерге салып жүрүшү керектигин, элге аралашып бийлеп кетсе үйүнөн чыкканына сүйүнүп жатат деген сөз тарай турганын белгиледи.
