БИШКЕК, 7-июл. — Sputnik. Жогорку Кеңештеги "Ата Мекен" фракциясынын лидери Өмүрбек Текебаевдин тарапташтары Ош — Бишкек жолун бойлой тигилген боз үйлөрүн жыйнаштырышты. Бул тууралуу кабарчы жеринен билдирди.
Маалыматка ылайык, "Ата Мекен" партиясынын координатору Кубат Артыков депутаттын тарапташтары партиянын штабына кайрылышса болорун билдирген.
"Мындан ары каалоочулар Базар-Коргон районундагы Совет айылында жаңыдан түзүлүп жаткан штабга кайрылышса болот", — деди Артыков.
Белгилей кетсек, Өмүрбек Текебаев камакка алынгандан тартып тарапташтары нааразычылык акцияларын өткөрүп келишет.
2017-жылдын 25-февралында Башкы прокуратура "Ата Мекен" фракциясынын лидери Өмүрбек Текебаевге жана башка адамдарга карата КР Кылмыш жаза кодексинин 303-беренесинин 1-бөлүмү (коррупция) жана 166-беренесинин 4-бөлүмүнүн 2-3-пункттарында (алдамчылык) камтылган белгилери боюнча кылмыш иши козгоп, ошол эле күнү депутат УКМКнын Тергөө башкармалыгына өткөрүп берилген.
Козголгон кылмыш иштин алкагында Өмүрбек Текебаев менен экс-элчи Дүйшөнкул Чотонов камалган.
