Азыркынын Жаңыл Мырзасы. Өлкө атын алыска таанытып, желегин желбиретип жүргөн намыскөй кыздарыбыздын бири балбан Айсулуу Тыныбекова. Азиянын азыркы чемпиону Польшада өткөн эл аралык турнирде биринчиликке ат салышып, тилекке каршы далысындагы жаракатына байланыштуу экинчи орунду алып калган. Эч нерсе эмес, анткени Айсулуу багынтчу ийгиликтер алдыда.
Ал ортодо мекендешибиз Валентина Шевченко менен бразилиялык Аманда Нуньестин беттешин кызуу күтүп жатсак, болбой калды. Себеби, мелдеш алдында Нуньестин саламаттыгы жайында болбой, ооруканага жатууга мажбур болгон. Бул тууралуу Шевченко дагы өз оюн билдирди.
"Орто Азиянын мыкты модели" аталган кыргыз чүрөгү. Көп кырдуу талант Мээрим Атантаева жакында эле Түштүк Кореяда өткөн Asian Model Festival сынагында мыкты модель аталып кайтты. Актриса, модель менен кабарчыбыз Гүлдана Талантбекова баарлашып, анын ийгилик сырларын билип көрдү.
Эркекти эр кылган да аял, жер кылган да аял. Мырзалардын иши илгери жылып, ийгиликтүү болушуна аялдын ролу чоң деп айтып калышат. Кыргызстандагы ар түрдүү чөйрөдө ийгилик жаратып эл оозуна алынып калган мырзалардын жүрөгүн кимдер, кантип багынтып алганын билгиңиз келеби? Атактуулардын сүйүү баянын бул жактан окуңуздар.
Барган сайын жашарган мукам үндүү Назми. Бир кезде Бек Борбиев менен хит ырларды аткарып жүргөн Назми учурда 39 жашта. Төрт баланын бактылуу апасын эч ким кырктын кырына келип калды деп айтпайт. Анткени ырчы улам стилин өзгөртүп, барган сайын жапжаш, супсулуу. Ырчынын жаштык сырын билгиңиз келсе дароо материалды ачып окуңуз.
Акактаткан жайдын ысык аптабында көлгө жетпесек да бассейнге барып туралы. Калаадагы бассейндер тууралуу маалыматыңыз жок болуп жатса бул жактагы картага үңүлүңүз. Алардын шарты, баасы, айтор керектүү бүт маалымат топтолгон.
Бүгүн да күн ысык болот экен. Убактыңыз болсо сууга чумкуп келиңиз.
Валюта наркы. Сомдун баасы долларга карата орто эсеп менен 69.47 (сатып алуу) жана 69.71 (сатуу) сомду түздү.
Мунай баасы. Бишкекте орточо эсеп менен алганда АИ-92 үлгүсүндөгү бензин 38.90 сом, АИ-95 үлгүсүндөгүсү 41.50 сом, ал эми дизель майы 36.90 сомдон сатылууда.
Соңку сөз. Мырзалар, айымдарыңарды алаканга салып, ардактап алгыла!
Жакшы маанай каалап Таалайгүл Усенбаева.
