БИШКЕК, 11-июл. — Sputnik. Премьер-министр Сооронбай Жээнбеков чек арачылардын туристтерге болгон мамилесин катуу сынга алды. Бул туурасында өкмөттүн маалымат кызматы билдирди.
Өкмөт башчы бүгүн, 11-июлда, чек ара көзөмөл өткөрүү пункттарынын ишин жакшыртуу боюнча кеңешме өткөргөн.
"Чек арачылардын чет элдик туристтерди кабыл алуусу боюнча көптөгөн арыз-даттануулар келип түшүүдө. Азыркы учурда тилекке каршы коррупциялык иштерге болгон далилдер жетишсиз. Бирок жакында анын баары ачыкка чыгарылат", — деп Жээнбеков билдирген.
Ошондой эле ал бардык мамлекеттик органдар чек арадан өтүүдөгү шарттарды жакшыртуу зарылдыгын белгилеп, үмүттү актабаган чек арачыларга катуу жазаларды кабыл алуу керектигин эскерткен.
