БИШКЕК, 14-июл. — Sputnik. Баткен облустук мусулмандар казыяты аталган дубандын аймагындагы балдар үйлөрүнө, медреселерге, жетим-жесирлерге, колунда жокторго 2017-жылы чогулган садака битирдин эсебинен 500 миң сомго чукул жардам көрсөттү. Бул тууралуу аталган казыяттын маалымат катчысы Фуркат Авлиёев кабарлады.
Жардам муктаж болгон 22 үй-бүлөгө берилди. Андан сырткары Исфана шаарындагы мүмкүнчүлүгү чектелген балдардын саламаттыгын калыбына келтирүүчү "Кулунчак", Үч-Коргон көмөкчү балдар интернаты, Үч-Коргон балдар үйү, Баткен шаарындагы "Нур", Самаркандек айылындагы "Үмүт" калыптандыруу борбору, Кызыл-Кыя шаарындагы "Үмүт" балдар борбору акчалай жардам алды.
Казыяттан жардам Кыргызстан Мусулмандар дин Башкармалыгы тарабынан кабыл алынган токтомдо көрсөтүлгөн тартипте таратылганын кошумчалашты.
