БИШКЕК, 22-июл. — Sputnik. Жалал-Абад — Балыкчы жолун асфальтоо уланууда. Бул тууралуу аймактык кабарчы жеринен билдирди.
Белгилей кетсек, Жалал-Абад — Балыкчы альтернативалык жолдун курулушу 2014-жылдын декабрь айында башталган. Аны бүткөрүү 2018-жылдын аягына белгиленген.
Жолдун курулуусун техникалык көзөмөлдөө кызматынын жетекчиси Кубанычбек Ормоновдун айтымында азыр курулуш жолдун бардык аймактарында жүрүп жатат.
"Учурда асфальттын экинчи катмарын төшөп жатышат. Аны менен бирге көпүрөлөр да курулуп бүтүп калды. Учурда жол четиндеги тротуарлар да кошо курулуп жатат", — деди Ормонов.
Ал келишим боюнча 1-фаза 2018-жылдын аягына бүтүрүлүшү керек экендигин кошумчалады.
Жалал-Абад — Балыкчы шаарларын туташтыруучу альтернативалык жолдун узундугу 433 чакырымды түзөт. Анын жалпы сметалык наркы 850 миллион долларга бааланган.
