БИШКЕК, 26-июл. — Sputnik. Быйыл алгачкы ирет Ысык-Көлдө өтө турган "Ала-Тоо таңшыйт" музыкалык фестивалы эл аралык деңгээлге чыгып, көлдү таза сактоого чакырык таштайт. Бул тууралуу Sputnik Кыргызстан агенттигине иш-чаранын негиздөөчүсү, продюсер Ырыс Окенова билдирди.
Анын айтымында, фестивалга эки же үч чет мамлекеттен меймандар келиши күтүлүүдө. Иш-чара 11-12-август күндөргө белгиленген.
"Салттуу музыканын майрамы өлкөбүздүн ар бир бурчунда өтүшү керек. Быйыл Ысык-Көлдө болсо, эмдиги жылы дагы башка жерде өткөрүүгө аракет кылабыз. Фестивалдын алкагында көлүбүздү таза кармоого, сактоого чакырык ташталат. Аны иш-чарага катыша турган ырчы-чоорчулар жасашат", — деди Окенова.
Фестиваль Чолпон-Ата, Балыкчы шаарларында жана Бөкөнбаев айылында өтөт.
Эскерте кетсек, "Ала-Тоо таңшыйт" улуттук музыкалык сыйлыгы 2015-жылы негизделип, бир жыл ичинде чыгармачылыгындагы жетишкендиктер менен өзгөчөлөнө алган өнөр адамдарынын арасынан мыктыларын тандап келген.
