Казакстанда "ЭКСПО-2017" эл аралык көргөзмөсүнүн алкагында түрк элдеринин салттык спортуна кирген "көкпар" оюну боюнча дүйнө чемпионаты өткөрүлөт. Бул тууралуу Кыргызстандын Көк бөрү федерациясынын маалымат кызматы кабарлады.
Билдирмеге карганда, мелдеш Астана шаарында 20-28 август күндөрү өткөрүлүп, ага 12 мамлекет катышат. Чучу кулак кармоонун жыйынтыгы менен "А" тобунда Кыргызстан, Түркия, АКШ, Өзбекстан, Монголия жана Тажикстан өлкөлөрү кез келсе, "Б" тобунда Казакстан, Азербайжан, Россия, Венгрия, Кытай, Афганистандын курама командалары намыс талашары белгилүү болду.
25-июлда Кыргызстандын Көк бөрү федерациясынын вице-президенти Жыргалбек Саматов жана курама команданын жетекчиси Талас Бегалиев чучу кулак кармоого катышып жана оюнда тартыла турган муляждын үлгүсүн көрүп келишкен.
Эрежеге ылайык, өз тобунан жеңип чыккан команда баш байге үчүн беттешүүгө чыгат. Ошондой эле бул мелдеште муляж менен ойноо каралууда.
Учурда Кыргызстандын көк бөрү боюнча курама командасы Ысык-Көлдө машыгууда.
