БИШКЕК, 31-июл. — Sputnik. Түркиянын бийлиги дин аалымы Фетхуллах Гүлен менен байланышы бар деп бир жума ичинде 831 кишини кармады. Бул тууралуу Рейтер агенттигине таянуу менен РИА Новости жазып чыкты.
Гүлен Түркияда төңкөрүш кылууга аракет жасаган деп айыпталып, учурда АКШнын Пенсильвания штатында жашайт.
2016-жылдын 16-июлунда көтөрүлүшчүлөр Түркияда төңкөрүш жасоого аракет кылган. Негизги каршылыктар Анкара жана Стамбул шаарларында болгон. Көтөрүлүш токтотулганы менен 240 түрк жараны каза таап, 2 миңден ашык адам жаракат алган.
Түрк бийлиги төңкөрүш аракетине Гүленди күнөөлөп, АКШдан аны экстрадиция кылууну суранган. Ал эми диний аалым өзү көтөрүлүштү сынга алып, ага тиешеси жок экендигин айтып чыккан.
АКШда жашап жаткан Гүленди кайтарып берүү боюнча Түркиянын талабын Америка аткара элек.
