БИШКЕК, 4-авг. — Sputnik. Мамлекеттик жаза аткаруу кызматы камактагы жаранга киргизилип бара жаткан героинди кармаганын аталган ведомстводон билдиришти.
2-август күнү №16 түзөтүү колониясында жаза өтөп отурган кишинин иниси, аялы жана энеси келген. Алар жолугушуу бөлмөсүнө тамак-аш жана уйдун ичеги-карыны салынган беш мүшөк алып киришкен.
Алып келген азыкты текшерүү маалында мүшөктөрдүн биринин ичинен баңгизат табылган.
Агасына жолукканы келген киши бул мүшөктөрдү ага абакка киргизип берип кой деп Ново-Павловка айылындагы "Заря" базарынан бейтааныш адам бергендигин билдирди.
Табылган героиндин салмагы 114,7 граммга жетти.
Учурда мүшөктөрдү базардан берип ийген адамдын өздүгү такталып, бул кылмышка тиешеси бар адамдар изделүүдө.
