Бишкек шаарынын жака белиндеги конуштарда 6 миңден ашуун үй мыйзамсыз салынган. Бул тууралуу Бишкек мэриясынын Жер пайдалануу жана курулуш башкармалыгынын башчысы Талантбек Иманакун уулу Sputnik Кыргызстан радиосуна маек куруп жатып билдирди.
Анын айтымында, аталган үйлөрдүн жарымын мыйзамдаштырса болот.
"Бишкек шаарынын жака белиндеги жаңы конуштарда мыйзамсыз салынып калган үйлөрдү тактап чыктык. Бүгүнкү күндө 6382 турак жай мыйзамсыз салынгандыгы аныкталды. Алардын арасында даяр үйлөр, фундаменттер жана туруп калган дубалдар бар. Учурда архитектурадан үч жарым миңге жакынын мыйзамдаштырууга уруксат алдык. Ал эми калгандарын мыйзамдаштырууга болбойт", — деди Иманакун уулу.
Ал мыйзамдаштырууга болбой турган үйлөр газ, жылуулук түтүктөрү жана чубалгылар өтчү жерлерге салынып кеткенин кошумчалады.
