БИШКЕК, 3-сен. — Sputnik. Кыргызстандык модель жана актриса Аида Чоткараева "Аалам сулуусу" эл аралык сынагында сүрөткө мыкты түшкөн келин деп тандалып, 25 сулуунун катарына кирди. Бул тууралуу Sputnik Кыргызстан агенттигине модель өзү билдирди.
Келиндер арасындагы сулуулар сынагы 28-август күнү Түштүк Африканын туристтик борбору — Дурбан шаарында башталган.
Чоткараеванын айтымында, сынакка ар кайсы өлкөдөн 85 катышуучу келип, ага "Сүрөткө мыкты түшкөн сулуу" титулу 1-сентябрда атайын сыйлыктарды тапшыруу учурунда ыйгарылган. Ал эми кийинки күнү модель 25 сулуунун катарына кирген.
"25 сулуунун катарына илинүү — бул жакшы жетишкендик болду. Себеби рейтингге Түндүк Америкадагы мамлекеттерден же Казакстан сыяктуу өлкөлөрдөн мыкты даярдык менен барган катышуучулар илине албай калды. Ошондой эле мелдеште командасы менен келген сулуулар да мыктылардын катарына кирбей калды", — деди Чоткараева.
Эске салсак, өткөн жылы аталган сынакта Кыргызстандын намысын 41 жаштагы Наргиза Осмонова коргогон. Жыйынтыгында "Миссис Бизнесвумен" наамын жеңип алган.
