БИШКЕК, 11-сен. — Sputnik. "Ош" базарынын жака-белиндеги көпүрөдөн кулап каза болгон кишинин өлүмү боюнча айрым маалыматтар аныкталгандыгын Бишкек ШИИБден билдиришти.
Эске сала кетсек, 8-сентбярь күнү 19:00дөр чамасында Токтогул менен Кулиев көчөлөрүнүн кесилишиндеги көпүрөдөн бир киши кулап каза болгон.
"Күбө белгисиз бирөө каза болгон адамды муштап туруп көпүрөдөн түртүп жибергенин айтты", — деп жазылат маалыматта.
Аталган факт боюнча кылмыш иши козголуп, шектүү катары Жалал-Абаддын 27 жаштагы тургуну кармалды. Учурда ал убактылуу кармоочу жайда.
Каза болгон жаран дагы Жалал-Абаддын жашоочусу экени аныкталды.
