БИШКЕК, 13-сен. — Sputnik. Түндүк Корея БУУнун Коопсуздук кеңешинин жаңы резолюциясын тааныбай турган жар салды. Бул тууралуу өлкөнүн Тышкы иштер министрлигинин билдирүүсүн тараткан Борбордук телеграф агенттигине таянып РИА Новости жазды.
Эскерте кетсек, буга чейин БУУнун Коопсуздук кеңеши Түндүк Кореяга карата алтынчы ирет жасалган өзөктүк сыноосунан кийин санкциялык режимди катаалдаткан. Ага ылайык, Түндүк Кореяга мунай заттарын ташып кирүүгө чектөө коюлду. Ошондой эле чийки мунай боюнча да чектөө киргизилип, анын көлөмүн өткөн 12 айдагы көрсөткүчтөн жогорулатпоо талабы коюлду. Мындан сырткары, суюлтулган газ сатып алууга жана текстилдик өндүрүштү сатууга тыюу салынды.
"Резолюция АКШ тарабынан ыплас ыкмалар менен жасалмаланган. Мындай аракетти Түндүк Корея кескин сынга алып, "2375 резолюциясын" тааныбайт", — деп айтылат маалыматта.
Түндүк Корея 3-сентябрь күнү баллистикалык ракеталарды жабдый турган зарядды ийгиликтүү сыноодон өткөргөнүн айткан. Япония менен Түштүк Кореянын аскерлери заряддын кубаттуулугун 120-160 килотоннага жетерин божомолдошту. Бул 1945-жылы Япониянын Хиросима менен Нагасаки шаарларына ташталган атом бомбаларынан бир нече эсе чоң. Андан бир жума мурун Пхеньян Япониянын аймагынан учуп өткөн баллистикалык ракетасын сынап көргөн.
