БИШКЕК, 16-cен. — Sputnik. "Газпром" корпорациясы жакынкы жылдары Кыргызстандын энергетикасына 100 миллиард рубль салат. Бул тууралуу Россия президенти Владимир Путин билдирди.
Эскерте кетсек, Сочиде орус лидери кыргыз журналисти Сыягүл Караманга интервью берген. Анда Путин кыргыз-орус мамилелери жана Кыргызстандын президенти Алмазбек Атамбаевдин жасап жаткан иштери тууралуу ой бөлүшкөн.
"Газпромдун" энергетиканы өнүктүрүү боюнча чоң пландары бар. Эгер биз Кыргызстандын президенти менен сүйлөшкөн келишимдерди ишке ашырсак, жакынкы аралыкта "Газпром" Кыргызстанды 60 пайызга чейин газ менен камсыз кыла алат", — деди Путин.
Ал эми 29-августта Бишкекте "Газпромдун" башчысы Алексей Миллер 2030-жылга чейин өлкөнү газ менен камсыз кылуу боюнча бардык милдеттер аткарыла турганын билдирген. Анын айтымында, учурда газдаштыруунун деңгээли өлкөдө 27 пайызды түзөт.
