БИШКЕК, 17-сен. — Sputnik. Премьер-министр Сапар Исаков россиялык белгилүү мушкерлер Дмитрий Бивол жана Сергей Кузьмин менен жолукту. Бул туурасында өкмөттүн маалымат кызматынан кабарлашты.
Алар Кыргызстанга машыгуу үчүн келишкен. Премьер спортчулар менен өлкөдөгү спорттун бул түрү, анын келечегин талкуулап, пикир алышты.
Бивол менен Кузьмин Ысык-Көлдөн алган таасирлери менен бөлүшүп, Кыргызстандын жаратылышына суктанганын, өлкөдөгү спорт үчүн түзүлгөн шарттар боюнча пикирлерин айтышты.
Алар эл аралык жооптуу таймаштардын алдында Ысык-Көлдө машыгуу абдан ыңгайлуу деген ойлорун билдиришкен.
Исаков 2018-жылы Кыргызстанда Көчмөндөрдүн дүйнөлүк III оюндары өтөрүн кабарлап, россиялык спортчуларды ага катышып кетүүгө чакырды.
Дмитрий Бивол Кыргызстанда туулган. Россияда жарым оор салмакта күч сынашкан кесипкөй мушкер. Спорттун эл аралык класстагы чебери, WBA (2016-ж.) боюнча дүйнөнүн учурдагы чемпиону.
Сергей Кузьмин – Россияда жарым оор салмакта рингге чыгып жүргөн кесипкөй мушкер. Спорттун эмгек сиңирген чебери.
