БИШКЕК, 25-сен. — Sputnik. Өткөн аптанын соңунда Бишкекте көчө театры эл аралык фестивалы өтүп, андагы кызыктар соцтармактарга жүктөлүп турду. Ал эми "Ты супер! Танцы" эл аралык сынагындагы кыргыз кызынын бийи жүрөктү элжиретти.
Sputnik Кыргызстан агенттиги узаган жумада социалдык тармактардагы кызыктуу сүрөт, видеолор топтомун сунуштайт.
1. Кыргыз кызы Россияда талантын тартуулады. Москвада өтүп жаткан "Ты супер! Танцы" эл аралык сынагына катышып жаткан Айдана Шатемирова өзүнүн бийи менен калыстардын өзгөчө алкоосуна татып экинчи турга өттү. Ушунуңдан тайба, ийгилик каалайбыз!
2. Ишемби күнү өкмөт башчы Сапар Исаков Эмен багында өткөн "Музыкалуу Эркиндик" иш-чарасына барды. Бул ирмемдерди башкаларга да Facebook баракчасы аркылуу түз эфирден көрсөтүп турду.
3. Жандуу эстелик. Театр фестивалында жандуу эстелик коноктордун көңүлүн бурду. Кээ бир тентектер улуу инсандардын эстелигине ар кандай жазууларды түшүрүп кеткенин көрөбүз. Эгер ал эстеликтер ушул сыяктуу жандуу болуп эми жазайын дегенде колго чапса ээ…
4. Эми бизди индейлер көрөт. Пан-флейтачы Лео Рохас сентябрдын башында Бишкекке болгон сапары учурунда тартылган видеону өзүнүн YouTube каналына жүктөдү. Андан Sputnik агенттигинин кеңсесине келип маек курган жана кесиптештерге автограф берген учурларын көрүүгө болот.
5. Бул эмне? Бишкек шаарынын тургуну Чолпон Мундузбаева социалдык тармактарга суудан чыккан "белгисиз жандыктын" сүрөттөрүн жарыялады. Кызыгы ал аны жер казып жатканда эмес, биз иче турган суу түтүгү жарылып кеткенде ичинен чыкканын айтты.
6. Ырчы кыз. Бул кыз кыялында чоң сахнада миңдеген көрүүчүлөрдүн сүрөөнүндө ырдап жатса керек. Тилегине жетсин!
7. Шумдугуң кур! Өзгөчөлүк жаратууга эч нерсе таба албаган окшойт. Үйлөнүү үлпөтүндө шаңдуу музыканын коштоосунда келинчегин кран менен алып түшүптүр. Кызык андан ары кандай унаа менен кетишти экен. Бул кайсы өлкөдө болгону белгисиз.
8. Эшектин жабуусу. Бүгүн күн суук болуп жылуу кийим кие баштадык. Мындай суукту алдын ала сезген эшек өзүнө кийим тиктирип алыптыр.
