Өлтүрүлгөн милициянын мурдагы кызматкеринин жакындары тосмо арыз жазган. Бул тууралуу жабырлануучу тараптын жактоочусу Болот Баетов Sputnik Кыргызстан агенттигине билдирди.
Анын айтымында, шектүү катары кармалган Алай районунун тургунуна карата Кылмыш жаза кодексинин 104-беренесинин негизинде кылмыш иши козголгон.
"Айыпкер каза болгон Майрамбек Нажиевдин ата-энесине моралдык жана материалдык чыгымын төлөп берген. Андан соң жабырлануучу тарап тосмо арыз жазды. Ош шаардык соту шектүүнү үч жылга шарттуу түрдө эркинен ажыратты", — деди Баетов.
Алгач облустук милиция Майрамбек Нажиев автокырсыктан көз жумгандыгын маалымдаган. Бирок маркумдун сөөгү эксгумацияланып, кошумча дайындалган соттук-медициналык экспертизанын корутундусу Нажиевдин башына автокырсыкка чейин эле катуу сокку урулгандыгы аныкталган.
"Ош облустук соттук-медициналык экспертиза бюросунун Алай райондук бөлүмүнүн башчысы киши колдуу болгон милициянын сержанты Майрамбек Нажиевдин өлүмү боюнча жалган корутунду чыгарып бергендиги үчүн ага карата иш козголуп, Ош шаардык соту тарабынан 100 миң сом айып салынган", — деп билдирди Баетов.
Милициянын сержанты Майрамбек Нажиев Алайдагы мектептин курулуш иштерине чейин Ички иштер министрлигинин алдындагы атайын адистештирилген күзөт кызматынын Кадамжай райондук бөлүмүндө иштеген.
