БИШКЕК, 2-окт. — Sputnik. Дем алыш күндөрү Бишкектеги Аалы Токомбаев көчөсүнүн 12-кичи райондон Шабдан баатыр көчөсүнө чейинки бөлүгүнө жолду бойлото дарактар отургузулду. Бул тууралуу мэриянын маалымат кызматы билдирди.
"Зеленстрой" ишканасынын кызматкерлери 38 дарак отургузушту. Аталган аллеяга план боюнча 600 дарак отургузулат.
Ошондой эле Медеров көчөсүнүн Панфиловдон Токтаналиев көчөсүнө чейинки бөлүгүнө 30 дарак тигилген. План боюнча 220 бак отургузуу каралган.
Мэриянын маалыматына ылайык, дарактарды түбү менен отургузуу ыкмасы Кыргызстанда биринчи жолу колдонулууда.
Борбор калааны көрктөндүрүү иштери октябрь айынын ортосуна чейин уланат.
План боюнча Киев көчөсүнө 149, Панфиловго 80, Логвиненко көчөсүнө 68 көчөт отургузулмакчы.
Жалпысынан Бишкекке 3 миң 855 көчөт тигилет.
