БИШКЕК, 5-сен. — Sputnik. Премьер-министр Сапар Исаков Өзбекстандын өкмөт башчысы Абдулла Арипов менен телефондон КР президенти Алмазбек Атамбаевдин аталган өлкөгө жасай турган расмий сапарын сүйлөштү.
Эки премьер, андан сырткары, эки мамлекеттин соода-экономикалык жана маданий-гуманитардык кызматташууларын талкуулады.
Эске салсак, бүгүн президент Алмазбек Атамбаевдин Өзбекстанга расмий иш сапары башталат. Анда эки өлкөнүн президенттери тар жана кеңири форматта жолугушуп, соода-экономикалык кызматташуулар жана чек ара маселеси боюнча сүйлөшөт.
Тараптар кайра иштетүү жаатындагы жана ЕАЭБге мүчөлүктүн алкагында логистикалык борборлорду ишке киргизүү боюнча маселелерди карашат. Мындан сырткары, "Ааламдашуунун алкагында Кыргызстан менен Өзбекстандын кызматташуусу" аталышындагы бизнес-форум болуп, эки өлкөдө өндүрүлгөн товарлар көрмөзмөсү уюштурулмакчы.
