БИШКЕК, 8-окт. — Sputnik. Вице-премьер Темир Жумакадаровдун жол тандабасы менен кагышкан жүк ташуучу автоунаанын айдоочусу эки айга камакка алынды. Бул тууралуу Sputnik Кыргызстан агенттигине ИИМдин маалымат кызматынан кабарлашты.
Белгилей кетсек, Москва районуна караштуу Садовое айылынын аймагында КамАЗ менен Land Cruiser кагышып, вице-премьер Жумакадыров, жардамчысы Нурлан Жамгырчиев жана айдоочусу Нурбек Муканов каза болгон. Аталган факты боюнча кылмыш иши козголуп, КамАЗ автоунаасынын айдоочусу кармалган.
Билдирүүгө ылайык, айдоочунун баш коргоо чарасы бүгүн, 8-октябрда Биринчи май райондук сотунда каралган.
"Соттун чечимине ылайык жүк ташуучу унаанын айдоочусу Бишкектеги №1 тергөө абагына эки айга камалды. Тергөө иштери уланууда", — деп айтылат билдирүүдө.
Темир Жумакадыровду акыркы сапарга узатуу зыйнаты 9-октябрь күнү саат 9.00дө Кыргыз улуттук академиялык театрында өткөрүлөт. Маркумдун сөөгү "Ала-Арча" көрүстөнүнө коюлат.
