БИШКЕК, 16-окт. — Sputnik. Борбор калаанын "Көк-Жар" кичирайонунда бычакталган жаш баланын өлүмү боюнча Бишкек ШИИБдин маалымат кызматы түшүндүрмө берди.
Эске салсак, 15-октябрь күнү Бишкек шаарынын аталган аймагында эртең мененки саат 7.20лар чамасында милиция кызматкерлери болжол менен 20 жаштагы жигиттин бычакталган сөөгүн табышкан.
Тергөө иштеринен соң ал баланын аты-жөнү, туулган жылы жана кылмыштын себептери такталган.
"Бычакталган 20 жаштагы бала 2016-жылдан бери шаардагы кафелердин биринде официант болуп иштечү. 14-октябрь күнү ал түнкү саат 01:00 чамасында жумуштан чыгып, кафеде бирге иштешкен үч бала менен жолуккан. Алар менен интернет клубга барып, ал жакта таңкы саат 06:30га чейин болушат. Таңга жуук балдар ортосунда чыр чыгып мушташка айланат да жыйынтыгында балдардын бири берки экөөнө бычак урган. Алган катуу жарааттан улам 20 жаштагы бала дароо жан берип, экинчи бала ооруканага жаткырылган ", — деп жазылат маалыматта.
Аталган факты боюнча Кылмыш жаза кодексинин "адам өлтүрүү" беренеси боюнча кылмыш иши козголуп, шектүү делип Ысык-Көл облусунун 20 жана 22 жаштагы тургундары кармалышты. Тергөө иштери жүрүп жатат.
