БИШКЕК, 20-окт. — Sputnik. Жалал-Абад облусунун Сузак районундагы төрт шайлоо участкасында президенттик шайлоонун жыйынтыгы жокко чыгарылганын Sputnik Кыргызстан агенттигине БШК төрайымынын орун басары Абдыжапар Бекматов билдирди.
Тиешелүү чечимди Сузак районунун аймактык шайлоо комиссиясы кабыл алган. АШК №2118, 2119, 2120 жана 2126 участоктордо каттоодон өткөн шайлоочулардын саны менен электрондук урналардын бюллетендеринин саны менен дал келбей калган. Бекматовдун айтымында, добуш берүүнүн ырааты бузулган, шайлоочу идентификацияланышы боюнча чек алып, аны бюллетенге алмаштыруусу керек болчу.
"Мунун шайлоонун жыйынтыгына дээрлик таасири жок. Төрт участок бул абдан аз аймак. Бул добуш берүү ырааты же кандайдыр бир эрежелер бузулганда АШКнын көрө турган мыйзам ченемдүү аракети", — деди Бекматов.
Шайлоо 15-октябрда өткөн. Кол менен саноонун алдын ала жыйынтыгы боюнча КСДПдан көрсөтүлгөн талапкер Сооронбай Жээнбеков 54,28 пайыз добуш алып, алдыда келе жатат. Жалпы жонунан шайлоого 1 миллион 690 миң 338 адам келген.
