Мумиянын тагдырын эки жумада чече турган атайын комиссия түзүлдү

БИШКЕК, 23-окт. — Sputnik. Бүгүн Жогорку Кеңештин социалдык маселелер, билим берүү, илим, маданият жана саламаттык сактоо боюнча комитетинде мумия чыры боюнча маселе каралып, аны кайрадан иликтеп чыгуу үчүн комиссия түзүлмөй болду.

Жогорку Кеңеш тарабынан комиссия мүчөлүгүнө Дүйшөн Төрөкулов, Рыскелди Момбеков, Алмазбек Токторов, Аида Исмаилова сунушталды. Ал эми окумуштуу, археолог жана башка тармактын өкүлдөрүнүн тизмеси эртең даяр болмокчу.

ЖК депутаты Рыскелди Момбековдун айтымында, түзүлгөн топ эки жума бою мумиянын илим үчүн канчалык баалуу экенин иликтейт.

"Комиссиянын чечими менен гана мумиянын көмүлгөн жерде калары же казылып алынары белгилүү болот", — деди депутат.

Жыйынга министр Казаков ден соолугуна байланыштуу келбей калгандыктан, анын ордуна министрликтин статс-катчысы Бактыбек Секимов катышты.

Ошондой эле Улуттук илимдер академиясынын жетекчилиги, окумуштуулар, археологдор жана мумияны көмүү чечимин кабыл алган комиссиянын мүчөлөрү келишти.

Эскерте кетсек, 14-октябрда Баткен облусунун Кара-Булак айылындагы Мактым-Гөр деген жерге IV-V кылымдарга таандык делген мумия жерге берилген.

Ал 1960-жылдан бери борбордук тарых музейинде сакталып келген.