БИШКЕК, 23-окт. — Sputnik. "Асанбай" паркынын аймагында жайгашкан бир нече кафени өрттөп жиберишкен деген версия жок экенин ӨКМдин анализ жана өрттүн алдын алуу бөлүмүнүн жетекчиси Сталбек Абдылда уулу билдирди.
Жекшемби күнү, 22-октябрда саат 10:15те өрт өчүрүү кызматына кафелерде өрт чыкканы боюнча билдирүү келип түшкөн. Кырсык болгон жерде 12 өрт өчүрүүчү машина жана куткаруучулар иштеген. Чыккан өрт саат 17:53тө толугу менен өчүрүлгөн. Тилсиз жоо 3100 чарчы метр жерге жайылган.
"Бир нече факторлор таасир эткен, анын ичине сапатсыз курулуш материалдары да кирет. Балким электр жабдуулары туура эмес колдонулган. Атайылап өрттөп жиберди деген версия жок. Кырсыктын чоо-жайы 10 күндөн кийин иликтөөнүн жыйынтыгында белгилүү болот", — деди Абдылда уулу.
Жалпысынан сегиз объект күйгөн. Алар: "Барклайс", "Бухара", "Ганбей", "Кайзер", "Корчма", "Марио" жана "Delta" фитнес-клубу.
