БИШКЕК, 24-окт. — Sputnik. Окурман Sputnik Кыргызстан агенттигинин WhatsApp номери аркылуу видео жиберип, ал колибри чымчыгын тартып алганын билдирди.
Анын айтымында, видео "Көк-Жар" конушунда тартылган. Аталган видео боюнча экология жана омурткасыз жаныбарлар систематикасы лабораториясынын илимий кызматкери, КР Улуттук илимдер академиясынын Биология жана топурак таануу институтунун энтомологу Дмитрий Милько түшүндүрмө берди.
Ал видеонун сапаты өтө начар болгондуктан чымчыктын түрүн так аныктай албагандыгын, бирок ал колибри чымчыгы эместигин айтты.
"Колибри (лат.: Trochiliformes "Трохилиформес") чымчыгынын 350дөй түрү бар, алардын бардыгы Түндүк Америкада жашайт. Алар Кыргызстанга алып келинген күндө да, биздин шартта жашап кете алмак эмес", — деди Милько.
Ал ошондой эле видеодогу "бражник" көпөлөгү болушу мүмкүндүгүн айтып, видеонун сапатынан улам кайсы түрү экенин атоодо кыйынчылык бар экенин билдирди.
Милько омурткалуу жаныбар менен (колибри, чымчык) омурткасыз жаныбарларды (бражник, көпөлөк) чаташтыруу дээрлик мүмкүн эместигин айтат.
"Тилекке каршы акыркы убактарда бизде мындай чаташтырган учурлар көп каттала баштады. Мындай көрүнүшкө өзүбүздүн жаратылыш тууралуу илимдин тартыштыгы жана коомдун экологиялык сабаттуулугунун төмөндүгү себеп болуп жатат. Ошондой эле бизде BBC каналынан көрсөтүлгөн океан тууралуу берүүлөр анча популярдуу эмес. Албетте бул видеолор эң сонун, бирок алар көрсөткөн жаныбарлар бизде жок. Жеке өзүмө бир жылда эки-үч жолу "колибри" чымчыгын көрдүм деп кайрылгандар болот", — деди ал.
