БИШКЕК, 26-окт. — Sputnik. "Кыргызстан сулуусу — 2017" сынагынын жеңүүчүсү Бегимай Карыбекова эл аралык сынакка барбай калгандыгы жөнүндө өзүнүн Instagram баракчасына жарыялады.
20-октябрь күнү ал Кытайдагы сулуулук сынагы башталганын, бирок коңшу өлкөнүн Кыргызстандагы элчилиги виза бербей жаткандыгын айткан. Ошондой эле ал бул сынакка даярданууга 20 миң доллар каражат жумштаганын кошумчалаган.
Карыбекованын айтымында, визаны күтүп жаткан кезде сынак башталып, ал кечигип калды.
"Бул аралык учурунда мени колдоп тургандарга, президенттин аппаратына жана вице-премьер Чолпон Султанбековага терең ыраазычылыгымды билдирем. Ошондой эле ЖМК өкүлдөрүнүн колдоосу дагы мага дем-күч берип турганын баса белгилегим келет", — деди Карыбекова.
Дүйнөлүк сулуулук сынагы 20-октябрдан 19-ноябрга чейин Кытайдын Санья шаарында өтмөкчү. Негизги сыйлык үчүн 156 мамлекеттен барган сулуулар ат салышат.
