БИШКЕК, 10-ноя. — Sputnik. Вьетнамда өтүп жаткан Азия-Тынч океан экономикалык кызматташтыгы (АТЭК) жыйынынын алкагында АКШ менен Россиянын президенттери Дональд Трамп менен Владимир Путин расмий түрдө жолукпайт. Бул тууралуу РИА Новости агенттиги Блумберг басылмасына таянуу менен билдирди.
Ак үйдүн расмий өкүлү Сара Сандерстин айтымында, Трамптын иш графигинин жыш болгонуна байланыштуу жолугушуу уюштурууга мүмкүн болгон эмес.
Бирок Кремль бул кабарды ырастаган жок. Путиндин маалымат катчысы Дмитрий Песковдун билдиришинче, макулдашуу жүрүп жатат, бирок так бир жыйынтык азырынча чыга элек.
Трамп өзү Россиянын башчысы менен жолугууга үмүт артарын жана ал маанилүү сүйлөшүү болорун айткан. Анын айтымында, Москва Пхеньянга басымды көбөйтүүгө жардамды күчөтө алышы мүмкүн.
Эки державанын башчылары акыркы жолу Германияда өткөн G20 саммитинде жолугушкан.
