Өмүрбек Бабанов фракция лидерлигинен кетүү себебин айтып билдирүү таратты

БИШКЕК, 23-ноя. — Sputnik. Жогорку Кеңештин депутаты Өмүрбек Бабанов "Республика — Ата-Журт" фракциясынын лидерлигинен эмне себептен кеткенин түшүндүрдү. Анын билдирүүсү НТС телеканалынын YouTube баракчасына жарыяланган. 

Белгилей кетсек, 13-ноябрда түштөн кийин Бабанов өз ыктыяры менен фракция лидерлигинен кеткени маалымадалган.

“Мен учурда Кыргызстандан тышкары жакта өзүмдүн ден соолугумду карап жатам. Менин саламаттыгым тууралуу айтылып жаткан ушак-кептер чындыкка дал келбейт. Саламаттыгым жайында. Биз бүгүн өлкөнүн жана элин кызыкчылыгы үчүн иштешибиз керек. Буга байланыштуу мен “Республика — Ата-Журт” фракциясынын жетекчиси кызматынан кетип жатам”, — деп билдирген Бабанов. 

Ошондой эле ал “Республика” партиясы жана “Республика — Ата-Журт” фракциясы штаттык режимде иштеп жатканын белгилеген. 

Эске салсак, ноябрь айынын алгачкы күндөрү Башкы прокуратура Жогорку Кеңештин депутаты Өмүрбек Бабановго карата конституциялык түзүмдү күч менен басып алууга чакырык жасоо жана улуттар аралык, расалык же диний кастыкты козутуу беренелери боюнча кылмыш ишин козгогон.

Бирок депутат ошол маалда өлкө аймагында жок экени белгилүү болгон. Кийин ал чет өлкөдө дарыланып жүргөнүн "Республика — Ата-Журт" фракциясынын башчысынын орун басары Руслан Казакбаев кабарлаган. 

Өмүрбек Бабанов "Республика" партиясын 2010-жылы негиздеген. Төрт жылдан кийин "Республика" жана "Ата-Журт" партиялары биригип, "Республика — Ата-Журт" фракциясы түзүлгөн.