БИШКЕК, 23-ноя. — Sputnik. Sputnik Кыргызстан маалымат агенттиги жана радиосунун кабарчысы Исмаил Мамытов ЖМКлар арасында "Жашыл экономика" форумунун алкагында өткөн конкурста "Мыкты радиоматериал" номинациясы боюнча биринчи орунду алды. Ага жалпысынан 100дөн ашык журналист менен блогерлер катышкан.
Конкурс төрт номинация боюнча өткөрүлгөн. Алар: "Мыкты макала", "Мыкты теле-радио материал", "Мыкты басылма" жана "Жашыл блогер".
Sputnik Кыргызстан маалымат агенттиги жана радиосунун улуттук версиясынын редактору жана алып баруучусу Исмаил Мамытов конкурска "Биогаз жабдуусун орнотуу" боюнча материалын жиберген.
"Бул жалпы Sputnik Кыргызстан агенттигинин жеңиши. Материалды жасоого көмөктөштөн кесиптештериме ыраазычылык билдирем. Дагы бир ирет мыкты адис экенибизди далилдей алдык. 100гө чукул эмгектин арасынын жеңип чыкканыбызга кубанып турабыз. Буюрса мындай сынактарга дагы да катыша беребиз", — деди Мамытов.
Sputnik Кыргызстан маалымат агенттиги жана радиосу 2014-жылдын декабрынан тарта иштей баштаган.
