Өмүрбек Бабанов алыстан туруп президент Сооронбай Жээнбековго кайрылды

БИШКЕК, 24-ноя. — Sputnik. Чет жакта жүргөн Жогорку Кеңештин депутаты Өмүрбек Бабанов президент Сооронбай Жээнбековду кызматына киришүүсү менен куттуктады. Бул тууралуу "Республика — Ата-Журт" фракциясынын катчылыгынан билдиришти.

"Сооронбай Шарипович, бүгүн сиз Алмазбек Шаршенович түптөгөн тынчтык менен туруктуулук жолун улантуу миссиясын колго алдыңыз. Кыргызстаныбыз менен элибиздин биримдиги жана бүтүндүгү – эң бийик баалуулук. Андыктан ниетибиздин окшош экендигине ишенем жана сизди президенттик кызматка расмий киришүүңүз менен куттуктайм!" — деп жазылат куттуктоодо.

Ошондой эле Бабанов Кыргызстан мыйзам жана олуттуу реформалар аркылуу өнүгүп, аймакта гана эмес, дүйнөдөгү үлгүлүү мамлекет болот деген ишенимин кошумчалады.

Эскерте кетсек, Башкы прокуратура тарабынан конституциялык түзүмдү күч менен басып алууга чакырык жасоо жана улуттар аралык, расалык же диний кастыкты козутуу беренелери боюнча кылмыш ишин козгогон Өмүрбек Бабанов учурда Кыргызстандын аймагында эмес. 

Партиялаштары анын чет өлкөдө ден соолугун чыңдап жүргөнүн билдиришкен.

Жума күнү, 24-ноябрда, Сооронбай Жээнбеков президенттик кызматка расмий киришти.