Бүгүн 3-декабрь мүмкүнчүлүгү чектелген адамдардын эл аралык күнү. Буга байланыштуу Sputnik Кыргызстан агенттиги ден соолугунун начарлыгына карабастан түрдүү тармактарда эмгектенген активтүү инсандарды таап чыкты.
Азамат Бердияров көзүнөн биринчи топтогу майып. Учурда "Манас жаңырыгы" радиосунда алып баруучу болуп иштейт. Ошондой эле медициналык академиянын укалоо бөлүмүн аяктап, жумуштан сырткары үйдө массаж жасайт. Жаш болгондугуна карабай маданияттын мыкты кызматкери наамын алууга жетишкен.
Отуз жаштагы Акбар Мендебаиров Мамлекеттик юридикалык академияда жарандык укук боюнча үч жылдан бери сабак берет. Андан сырткары, бейөкмөт уюмунда өзү өңдүү көзү азиз адамдарга компьютер, телефон пайдалануу боюнча курстарды өткөрүп, алардын айрымдарына юридикалык кеп-кеңеш берет.
Гүлбарчын Исаева биринчи топтогу майып. Ден соолугуна байланыштуу колясканын жардамы менен жүрүп, үйүндө кол өнөрчүлүк менен алектенет. Чебер айым кичинекей балдарга кийим тигип, кийизден түрдүү буюмдарды жасайт. Эмгектерин буюртма алып же көргөзмөлөргө чыгарып сатат. Гүлбарчын комуз чертүү жана ыр боюнча республикалык сынактардан жеңүүчү аталган.
Замир Аданов борбор калаадагы №6 шаардык ооруканада укалоочу болуп эмгектенет. Ал бул кесипти беш жылдан бери аркалап үй-бүлөсүн багып келет.
Бегималы Мырзамамытов беш жылдан бери жеңил атлетика менен машыгат. 2014-жылы Кыргызстандын атынан Түштүк Кореядагы паралимпиада оюндарына катышкан. Спортчу өлкөдөгү бир катар мелдештердин жеңүүчүсү болгон. Көзүнөн биринчи топтогу майып. Үч баланын атасы.
Гүлбарчын Туйгунова үйүндө сайма сайып, кийим тигет. Кол өнөрчүлүктүн арты менен жалгыз кызын багып, колледжде окутат. Биринчи топтогу майып.
