БИШКЕК, 5-дек. — Sputnik. Премьер-министр Сапар Исаков Ысык-Көлдүн Жууку капчыгайындагы кыйылган карагайлар боюнча текшерүү жүргүзүүнү тиешелүү ведомстволорго тапшырды. Бул тууралуу өкмөттүн маалымат кызматы билдирди.
Ага ылайык, премьер Экологиялык жана техникалык коопсуздук боюнча мамлекеттик инспекцияга, Айлана-чөйрөнү коргоо жана токой чарбасы мамлекетик агенттигине, өкмөттүн Ысык-Көл облусундагы ыйгарым укуктуу өкүлчүлүгүнө тапшырма берген.
Белгилей кетсек, социалдык тармактарга Жууку капчыгайында Тянь-Шань карагайлары кыйылганы боюнча маалымат чыгып, сүрөттөрү да тараган.
"Өкмөт башчы Ысык-Көл облусунун Жууку капчыгайындагы токой кыюуну токтотуп, ага мындан ары тыюу салууну жана мыйзам бузуучуларга карата катаал чараларды көрүүнү тапшырды", — деп айтылат маалыматта.
Андан сырткары укук коргоо органдары карагайды мыйзамсыз кыюуга тийиштиги барларды аныктап, жоопкерчиликке тартуу милдети жүктөлдү.
Ысык-Көл облусундагы Жууку капчыгайы биосфералык аймак макамына ээ, анын жаратылышы өзгөчө коргоодо турат.
