Пресс-турдун максаты мектептердеги коопсуз билим берүү тууралуу кененирээк тааныштыруу болду. Аларга: жарыктын эффективдүүлүгү, экологиялык жашылдандыруу, ысык тамак, жарыктандыруу, санитария жана гигиена, коопсуз аба жана видео көзөмөлдү орнотуу сыяктуу нерселер кирет.
Электр энергиясын үнөмдөөгө өткөн мектеп
Билим берүү министри Гүлмира Кудайбердиева журналисттер менен биргеликте Новопокровка айылындагы №2 мектепке баш бакты. Министрдин айтымында, мектептеги маалымат коопсуздугу чоң роль ойнойт. Акыркы жылдары 775 мектеп интернетке тутуштырылган.
"Мектептерди компьютердик жабдуулар менен камсыздоодо кыйынчылыктар бар. Бирок кийинки жылы каражат таап, бул маселени чечишибиз керек", — деди министр.
Мектеп директору Фарида Низамудинова "БИОМ" экологиялык биримдиги эл аралык стандарттагы коопсуздукка жооп берген атайын жылуулук үнөмдөөчү эки терезе жана жарыктандыруу орнотуп бергенин кошумчалады.
Андан сырткары, мектептин үстүнө күн нурунан электр энергия алган батареялар орнотулган. Мындай жол менен электр энергия үчүн ай сайын 500-600 сом үнөмдөлөт.
Бөбөктөргө ылайыкташкан шарт
Долбоордун жемиштүү иштеринин бири — инновациялык жуунучу бөлмөлөрдүн орнотулушу. Ага кол жуучу жай жана балдардын тулку боюна ылайыкташкан унитаздар кирет. Мектеп, мектепке чейинки, мектептен тышкары билим берүү башкармалыгынын жетекчиси Марат Үсөналиев мындай жабдуулар менен өлкөдөгү 300 мектеп камсыздалганын кошумчалады.
Ысык тамак берүүгө өткөн мектептер
Кийинки сапар Орловка шаарчасындагы №1 Кудряшов жана Чолпон-Атадагы Абдуразаков атындагы пилоттук мектептерде болду. Бул мекемелердеги ысык тамак берүү демилгеси БУУнун Бүткүл дүйнөлүк азык-түлүк программасынын "КРдин мектептерине тамак берүүнү жөнгө салуу" долбоорунун алкагында ишке ашкан.
БУУнун Бүткүл дүйнөлүк азык-түлүк программасы мектептерди төмөнкүдөй заманбап жабдуулар менен камсыздаган. Алар: электрондук меш, камыр кескен машина, жашылча туурагыч, суу кайнаткыч, кол жуучу жай жана башка ушундай сыяктуу техникалык жардамдарды көрсөтүшкөн. БУУнун БДАП жана жергиликтүү бийлик органдары окуучулар менен ашпозчулар үчүн техникалык инфраструктураларды түзүп берген.
Орловкадагы №1 Кудряшов атындагы мектеп директору Павел Поповдун айтымында, башталгыч класстагы окуучулардын ата-энелери дагы ысык тамак берүүгө өз ыктыярлары менен көмөк көрсөтүп келишет. Бирок мындай кадамдар расмий тендер менен ишке аша элек.
"Шаар ичинде тендер менен иштешүүнүн мааниси бар. Азырынча ата-энелер жер жемиш менен жардам берип жатышат. Кээде бекер, кээде арзан баада сатып алабыз," — деди Попов.
Биргелешип иштешүүнүн жыйынтыгында башталгыч класстын 274гө чукул окуучусу жумасына беш жолу ысык тамак менен камсыздалган. Менюда сүт боткосу, шорпо, экинчи тамактар, ун тамактары, сүт жана шире суусундуктары каралган.
Ошондой эле Чолпон-Атадагы Абдуразаков атындагы мектептин башталгыч классынын 580 окуучусу жумасына беш жолу ысык тамак ичет.
