БИШКЕК, 25-дек. — Sputnik. Жаңы жылдан алдын майрамдык корпоративдер биринин артынан бири тынбай өтүп жатат. Жекшемби күнү маалымат желесине айланган Facebook тармагынын колдонуучулары жаңы жылдык кечеге чогулушту. Sputnik Кыргызстан агенттиги узаган жума ичиндеги соцтармактарга жүктөлгөн сүрөт, видеолор топтомун сунуштайт.
Дүрбөлөң салган калпакчан ит. Жума күнү Бишкекте Dog"s Fashion Show 2018 деп аталган иттердин мода көргөзмөсү болуп өткөн. Анда итине калпак кийгизип алып чыккан катышуучу катуу сынга кабылды. Сүрөт коомчулукка желдей тарап, көпчүлүк ит ээсинин жазага тартылуусун талап кылып чыгышты. Ал эми уюштуруучулар анын жаман ою болбогонун айтып, тескерисинче, кыргыздын улуттук колоритин көрсөткүсү келген дешүүдө.
Эл ичи — өнөр кенчи. Ди-джей Дария Санташова менен ырчы Каныкейди өзүндөй кылып туураган породист жанындагы жоролорун эле эмес, соцтармактагыларды да күлкүгө бөлөдү. Ал Каныкейдин манерасынан тартып ырдаганына чейин аябай өздөштүрүптүр.
Non stop дуэтинин мурунку солисти Максат Садырбеков сүйлөшүп жүргөн кызын коомчулукка ачыктап чогуу түшкөн сүрөтүн жарыялады. Ырчынын сүйүктүүсү дагы чыгармачылык чөйрөдөн алыс эмес. Максаттын Модель Айсулуу Молдалиева менен мамиле куруп жүргөнү маалым болду.
Чолпондун бала чагы. Ал эми Максат менен 10 жыл бирге дуэт ырдап келген Чолпон Талипбекова окуучу курагында балатынын жанында түшкөн сүрөтүн жүктөп бала чагын эскерген.
16 жыл мурунку видео. Эл оозуна алынып калган ырчы Аваз Акимовдун 2001-жылы тартылып калган видеосун тамада Аман Ибраев жарыялаган. Анда "Токтогулга кетесиңби" деген чыгарманы аккордеондо созгон экен.
Көбүк бүрккөн аргымактар. Кыштын келиши менен ушундай улак тартыштар башталат. Мында эреже деле анча каралган эмес. Кимиси жоон билек, аргымагы күлүк болсо ортодон улакты сууруп чыгып соорун алат.
