БИШКЕК, 25-янв. — Sputnik. Мурдагы депутат, Бишкек шаарынын экс-мэри Нариман Түлеевдин мамлекетке келтирген чыгымын толуктоо үчүн берген батирлеринин үчөө Башкы прокуратурага, сегизи Бишкек шаарынын мэриясына өткөн. Бул маалыматты Sputnik Кыргызстандын жиберген сурамына жооп кылып, мэрия менен башкы көзөмөл органынан кабарлашты.
Түлеев соттун чечими менен мамлекетке келтирген 60 миллион 671 миң 304 сомдук материалдык чыгымды ордуна келтирген. Анын бир бөлүгүн акчалай берсе, калганын курулуп жаткан үйдөгү 11 батир менен жапкан.
Түлеевдин батирлери туурасында Sputnik Кыргызстандын жиберген сурамына Башкы прокуратура жооп кайтарып, үч батир аларга тийгендигин билдирди.
"Премьер-министрдин 2016-жылдын 30-майындагы тапшырмасынын негизинде Мамлекеттик мүлктү башкаруу фондусунун 2016-жылдын 20-июнундагы буйругуна ылайык, Бишкек шаарынын Москва көчөсү, 191 дарегинде жайгашкан бир бөлмөлүү үч батир Башкы прокуратурага кызматтык үй катары өткөрүлгөн. Алар ремонту жок, кара жумуш жасалгасы менен", — деп жооп беришти Башкы прокуратуранын иш башкармалыгынан.
Ал эми калган үч бөлмөлүү сегиз батирди Мамлекеттик мүлктү башкаруу фондусу Бишкек шаарынын мэриясынын балансына өткөрүлгөн.
2013-жылы Ленин райондук соту Түлеевди 2008-жылы Кытайдан автобустарды алып келүүдө коррупцияга катыштыгы бар, шаардагы бала бакчанын имаратын саткан жана муниципалдык 200 миллион сомдук облигацияны чыгарууда кызматынан кыянаттык менен пайдаланган деген айып менен 11 жылга эркинен ажыраткан. Андан соң райондук соттун чечимине карата доо арыз жазылып, ишти Бишкек шаардык соту караган. Аталган сот биринчи инстанциянын чечимин күчүндө калтырган. Иш Жогорку сотто да каралып, соттук коллегия бир аз өзгөртүү киргизип, 11 жыл жаза өткөрүүнү күчүндө калтырган. Андан сырткары, акчалай айып салган.
Түлеев эки ирет амнистияга дал келип, ага коюлган 35 миллион айыпты толук төлөгөн соң, 2017-жылы 7-майда эркиндикке чыккан. Ал абакта төрт жыл отурган.
